O ciclo Monográficos Iacobus IX desenvolverase ao longo de dúas xornadas cun programa que toma como punto de partida o Convento de San Francisco de Santiago para proxectar, desde este espazo concreto, reflexións máis amplas sobre a historia, a arte e o patrimonio.
Entre as intervencións previstas destaca a participación de varias investigadoras e investigadores vinculados ao CISPAC, que achegarán distintas aproximacións ao estudo do conxunto franciscano. Juan M. Monterroso Montero abordará a ampliación do espazo conventual en Santiago, mentres que María Dolores Barral Rivadulla centrará a súa intervención na análise da maqueta da mesquita de al-Aqsa e do Domo da Rocha. Pola súa banda, Begoña Fernández Rodríguez tratará o proceso de exclaustración e a posterior recuperación do convento entre os séculos XIX e XX.
O programa complétase coas achegas doutros membros do grupo Iacobus da Universidade de Santiago de Compostela, así como con intervencións doutros investigadores e investigadoras, configurando unha proposta que aborda a relevancia histórica e cultural deste espazo desde múltiples enfoques.
Xunto ás sesións académicas, as xornadas inclúen actividades complementarias como visitas ao arquivo e á biblioteca do convento, así como percorridos polo propio recinto, reforzando así o vínculo entre investigación e patrimonio material e favorecendo unha aproximación directa aos seus fondos e á súa historia.
Consulta o programa completo:
