O persoal investigador vinculado ao CISPAC continúa a desenvolver unha intensa actividade académica a través de publicacións que dialogan con algúns dos principais debates sociais, políticos e territoriais do presente. Nos últimos meses, investigadores e investigadoras do centro participaron en libros, obras colectivas, artigos científicos e materiais vinculados a proxectos europeos que permiten afondar en cuestións como a revitalización rural, as migracións, as nacións sen Estado ou as violencias de xénero.
No marco do proxecto europeo EC4RURAL, Xavier Simón Fernández, investigador da UVigo-CISPAC, coordina a publicación Rural Energy Communities: Bridging Local Action and Clean Energy Transition, resultado da conferencia europea do proxecto. A obra aborda o papel das comunidades enerxéticas rurais nun contexto marcado polo declive demográfico, a pobreza enerxética e os desafíos da transición cara ás enerxías limpas. Fronte a modelos de implantación renovable dirixidos por intereses externos e afastados das comunidades locais, a publicación pon o foco nas posibilidades dunha transición construída desde abaixo, baseada na participación cidadá, a propiedade comunitaria e a gobernanza local.
Tamén no ámbito da historia política e social, Roque Sanfiz Arias e Lourenzo Fernández Prieto, investigadores de HISTAGRA-CISPAC, participan na obra colectiva Un século de nacións. Galicia, Euskadi e Catalunya, publicada por Ediciones Trea na colección Piedras Angulares. O libro propón unha revisión histórica dos procesos de construción nacional en Galicia, Euskadi e Catalunya, tomando como punto de partida o contexto aberto polo pacto de Galeusca de 1923 e os seus ecos máis dun século despois.
Pola súa banda, Keina Espiñeira e Belén Fernández-Suárez, investigadoras de ESOMI-CISPAC, publican na Revista Española de Sociología o artigo “Análisis multinivel de las agendas territoriales sobre migraciones y desarrollo en regiones periferizadas de España: ¿qué sucede ante un rural más diverso?”. A investigación analiza a relación entre gobernanza migratoria, desenvolvemento rural e políticas públicas en comunidades como Galicia, Castilla y León, Castilla La Mancha e Aragón, atendendo ás oportunidades, friccións e desafíos que xorden na súa implementación.
Finalmente, Xosé M. Santos Solla, investigador da USC-CISPAC, participa xunto con Susan M. Shaw, Jayamala Mayilsamy, Kamalaveni Veni, Laura Pallarés Ameneiro, Zenetta Rosaline e Janet Lockhart na publicación Resisting Gender Violence, editada pola Oregon State University. A obra ofrece unha perspectiva global sobre a violencia de xénero, incorporando achegas desde Europa, África, Asia e América e poñendo o foco nunha das vulneracións dos dereitos humanos máis estendidas no mundo.
