O CISPAC celebrou no Edificio Fontán da Cidade da Cultura o acto de benvida ao novo persoal investigador do centro. O encontro deu comezo co saúdo formal aos novos membros, momento no que interviron Pilar Bermejo Barrera, vicerreitora de Política Científica da USC; e os membros do equipo directivo Lourenzo Fernández Prieto (director científico), Laura Oso (directora adxunta) e Xavier Simón (director de transferencia).
Nesta presentación sinalaron as liñas de traballo do centro, os servizos que ofrecen aos seus investigadores, as instalacións e as perspectivas de futuro que pretenden acadar. Pilar Bermejo sinalou a importancia de ter un equipo humano plural e que combina máis de 200 persoas vinculadas de diferentes cargos académicos. O equipo directivo salientou tamén a variada procedencia de área de estudo dos novos investigadores e investigadoras, que chegan para reforzar os cinco campos do CISPAC (paisaxes visitadas, con patrimonio, gobernadas, que producen e que teñen xente) seguindo tres liñas estratéxicas: territorio, sustentabilidade e xénero.
Con esta nova chamada, o centro pasa de estar composto por 72 membros adscritos a incorporar 44 novos investigadores e investigadoras representantes das tres universidades galegas: 16 da Universidade de Santiago de Compostela, 14 da Universidade de Vigo e 14 da Universidade da Coruña.
O acto continuou coa presentación das instalacións do centro, así como os servizos que ofrece para o seu persoal. Seguidamente foron organizadas cinco mesas de traballo por campos especializados, co fin de presentar os proxectos en curso e intercambiar dinámicas de traballo e perspectivas, así como abrir espazos de colaboración entre investigadores.
Para pechar o encontro levouse a cabo unha sesión de traballo conxunta na que recompilaron as dinámicas comentadas e a integración dos novos membros, a modo de conclusión. Interviu o equipo directivo xunto con Jose Carlos Sánchez Pardo e José Antonio Fraiz Brea, membros do comité científico.
